చెలిమి విలువ దూరాలు కరగడం తోనే

 

వెలుగు విలువ చీకటితోనే ,

సంతోషం విలువ బాధ తోనే,

గెలుపు విలువ ఓటమి తోనే ,

సంతృప్తి విలువ ఆకలి తోనే ,

ఆనందం విలువ ప్రతీక్ష తోనే,

చెలిమి విలువ దూరాలు కరగడం తోనే ..

కలహం

కావలసిన వారితో లాలనగా హాస్య మైత్రి

ప్రతి కలహం వెనుక మైత్రి ఉంటుంది

ఉఛ్వాస నిఛ్వాసల మధ్య కలహం ఉంటుంది,

ఆ కలహం లేకుంటే ప్రాణం లేదు.

మంచి చెడుల మధ్య కలహం ఉంటుంది ,

ఆ కలహం లేకుంటే విచక్షణ లేదు .

కలపకి కలపకి మధ్య కలహం ఉంటుంది ,

ఆ కలహం లేకుంటే నిప్పు లేదు .

ఆమనికి విత్తుకి మధ్య కలహం ఉంటుంది  ,

ఆ కలహం లేకుంటే చెట్టు లేదు .

ఆలోచనకి ఆచరణకు కలహం ఉంటుంది ,

ఆ కలహం లేకుంటే మనిషికి మనుగడ లేదు   .

భావానికి పదానికి కలహం ఉంటుంది ,

ఆ కలహం లేకుంటే కవిత్వం లేదు .